Во шпанскиот главен град Мадрид, на почетокот на 2027 година конечно би требало да започне изградбата на населбата Валдекарос, која воедно ќе биде и најголема во Европа.
Наскоро се очекува на градилиштето на проектот Валдекарос да пристигнат и првите кранови, со што ќе започне првата фаза од развојот на подрачјето предвидено за изградба на 51.656 станбени единици.
Доколку роковите бидат испочитувани, до крајот на оваа деценија првите жители би требало да започнат да се вселуваат во населбата проектирана за околу 150.000 луѓе. Околу 55 отсто од домовите ќе бидат со некаков облик на станбена заштита, додека 40 отсто од земјиштето ќе биде претворено во зелени површини.
Валдекарос е дел од таканаречената Југоисточна стратегија, заедно со други развојни проекти како Ел Канаварал, Лос Берокалес, Лос Ахијонес и Лос Серос, но по големина е во посебна категорија.
Неговите 19 милиони квадратни метри, практично, одговараат на дополнителна градска област за Мадрид. Планот предвидува 51.656 домови, од кои околу 55 отсто ќе бидат некаков облик на јавно или достапно домување, што го прави најголемиот проект за достапно домување планиран во главниот град во следните 20 години.
Првите три фази од развојот опфаќаат 13.371 дом. Работите на инфраструктурата се во тек од 2021 година, а Одборот за компензација проценува дека изградбата на првите станбени објекти ќе започне меѓу 2026 и 2027 година.
Со оглед на тоа дека изградбата на една станбена зграда вообичаено трае меѓу 24 и 30 месеци, првите станари би можеле да ги добијат клучевите кон крајот на 2028 или во текот на 2029 година.
Една од главните карактеристики на проектот се зелените површини. Од вкупно 19 милиони квадратни метри, околу 7 милиони се предвидени за зелени површини, што претставува речиси 40 отсто од целата површина.
Урбанистичкиот план предвидува ниту еден дом да не биде оддалечен повеќе од 200 метри од парк, а планирано е и засадување на повеќе од 110.000 дрвја како дел од идната Метрополитенска шума.
Внатрешната мобилност е планирана со фокус на пешаците и велосипедистите. Главниот план предвидува повеќе од 127 километри велосипедски и пешачки патеки, со што значителен дел од секојдневните патувања, како до училиште, здравствен центар или продавница, би можел да се реализира без автомобил.
Покрај тоа, предвидени се булевари со дрвореди, плоштади и зелени коридори кои ќе го поврзуваат Валдекарос со останатиот дел од проширувањето на Валекас и со главните еколошки коридори во југоисточниот дел на Мадрид.
Вкупната вредност на проектот се проценува на 8 милијарди евра, од кои 2,5 милијарди евра ќе бидат издвоени исклучиво за изградба на станбени и други објекти.
