Авиокомпанијата Flydubai соопшти дека привремено ќе ги суспендира сите летови до и од Израел додека трае истрагата за инцидентот што можеше да резултира со уривање на авионот кој леташе кон Тел Авив.
Од компанијата наведоа дека истрагата за инцидентот е во тек.
„Оваа привремена суспензија ќе им овозможи на надлежните органи да продолжат со работата и да ги утврдат сите факти поврзани со инцидентот. Целосно сме посветени на поддршката на тековната истрага и на одржувањето на највисоките безбедносни стандарди во нашата мрежа“, соопштија од компанијата.
Од Flydubai порачаа дека ќе соработуваат со израелските и со другите надлежни власти.
„Остануваме во тесна соработка со владините институции, регулаторите и сите чинители на аеродромите и ќе ја преиспитаме суспензијата штом ќе бидат достапни повеќе информации“, додадоа од компанијата.
Потсетуваме, пилотот на летот кон Тел Авив со нож го нападна копилотот, по што следуваше драматична ситуација во авионот.
Станува збор за лет кој од Абу Даби леташе кон Тел Авив, а израелскиот премиер Бенјамин Нетанјаху во порака наведе дека целта на пилотот била да го урне авионот во Израел.
Пилотот е уапсен и во моментов се наоѓа во Саудиска Арабија.
