Македонија минатата година со извозот покрила 69,4 отсто од увозот на стоки, покажуваат податоците на статистичките институции од регионот. Со тоа земјата има подобар однос меѓу извозот и увозот од Хрватска, Босна и Херцеговина, Албанија и Црна Гора.
Според податоците, земјава во 2025 година извезла стоки во вредност од 8,01 милијарди евра, додека увозот достигнал 11,55 милијарди евра. Тоа значи трговски дефицит од околу 3,54 милијарди евра, а извозот покрил 69,4 отсто од увозот.
Најдобар однос во регионот има Србија. Нејзиниот извоз минатата година достигнал 33,07 милијарди евра, со раст од 8,4 отсто, додека увозот изнесувал 41,86 милијарди евра, што е раст од 7,2 отсто. Со извозот биле покриени 79 отсто од увозот, а трговскиот дефицит изнесувал 8,79 милијарди евра.
Во Босна и Херцеговина извозот покрил 56,7 отсто од увозот. Извозот изнесувал околу 8,68 милијарди евра, а увозот 15,32 милијарди евра.
Хрватска која е члнка на ЕУ има најголем дефицит со покриеност од 55,8 отсто. Минатата година земјата извезла стоки во вредност од 25,24 милијарди евра, а увезла 45,23 милијарди евра. Трговскиот дефицит достигнал околу 20 милијарди евра.
Албанија има покриеност од 39 отсто, додека Црна Гора е на дното со само 12,8 отсто. Црна Гора минатата година извезла стоки во вредност од 572,3 милиони евра, а увозот достигнал 4,46 милијарди евра.
Најновите податоци покажуваат дека и во земјава увозот расте побрзо од извозот, што влијае врз трговскиот дефицит.
