Светското првенство во фудбал значително влијаело врз работните навики на вработените во Соединетите Американски Држави, бидејќи голем број работници отсуствувале од работа или работеле од дома за да ги следат натпреварите, покажува анализата на компанијата Envoy.
Според податоците, бројот на вработени кои дошле во канцелариите на 7 јули, ден по поразот на американската репрезентација од Белгија, бил за 26 проценти помал од вообичаениот просек, пренесува „Блумберг“.
Падот бил речиси десетпати поголем отколку ден по финалето на Супербоул, еден од најгледаните спортски настани во САД.
Интересот за натпреварите на Светското првенство влијаел врз работната продуктивност и за време на целиот турнир. На денот кога играла американската репрезентација, бројот на доаѓања во канцелариите бил за 8,5 проценти помал во споредба со просечен понеделник во претходните три месеци.
Според проценките на компанијата UKG, која развива софтвер за управување со работна сила, Светското првенство би можело да ја чини американската економија околу 11,7 милијарди долари поради изгубена продуктивност, додека глобалната загуба би можела да достигне 17 милијарди долари.
Повеќе од една четвртина од американските работници планирале за време на турнирот да доцнат на работа, да си заминат порано или целосно да отсуствуваат за да ги следат 104-те натпревари. Особен проблем претставувале средбите што, поради временската разлика, се играле во текот на работното време во САД.
Компаниите се обиделе да ги ублажат последиците од фудбалската еуфорија. Некои големи работодавачи, меѓу кои банките JPMorgan Chase, Goldman Sachs и S&P, ги охрабриле своите вработени да работат од дома во деновите кога се играле натпреварите, со цел да се избегнат сообраќајните метежи и проблемите со пристигнувањето на работа.
Аналитичарите посочуваат дека големите спортски и културни настани традиционално влијаат врз продуктивноста на вработените. Слични падови на присуството на работните места биле забележани и за време на Олимписките игри, како и по огромниот интерес за филмовите „Барби“ и „Опенхајмер“ во 2023 година.
