Матијас Депфнер, извршен директор и косопственик на германскиот медиумски концерн „Аксел Шпрингер“, се обидел неговата компанија да преземе удел во европскиот бизнис на ТикТок. Предлогот му го претставил на Чарлс Кушнер, амбасадор на САД во Франција, објавува „Фајненшл тајмс“, повикувајќи се на извори запознаени со разговорите.
Според пишувањето на весникот, Депфнер во јануари го угостил Кушнер, таткото на Џаред Кушнер, зетот на американскиот претседател Доналд Трамп, на ручек во седиштето на „Аксел Шпрингер“ во Берлин. Во таа пригода предложил неговата компанија да биде дел од договорот за преземање на европскиот дел од апликацијата, која е во кинеска сопственост.
Моделот на американскиот договор
Предлогот, според истите извори, е сличен на договорот што Трамп го постигна за издвојување на американскиот дел од ТикТок поради загриженоста за националната безбедност.
Со тој договор, инвеститорите со кинеската компанија „Бајтденс“ основаа заедничка компанија со седиште во Калифорнија, која доби поголема контрола врз алгоритмот и податоците на американските корисници.
Како што пренесува Investing.com, „Аксел Шпрингер“ потврдил дека е заинтересиран за „европско решение“ за ТикТок. Од друга страна, „Бајтденс“ ја отфрлила таа идеја, наведувајќи дека немало формални разговори за преземање.
Депфнер подолго време се залага ТикТок да премине во сопственост на компании од демократски држави. Во мај, според израелскиот весник „Израел Хајом“, тој ја нарекол платформата една од најопасните пропагандни машини во светот и порачал дека Европа треба да го следи американскиот пример.
„Аксел Шпрингер“ е сопственик на медиумите „Политико“, германските весници „Билд“ и „Ди Велт“, а годинава го презеде и британскиот весник „Телеграф“ за 575 милиони фунти.
