Референтниот кинески берзански индекс CSI 300 во четвртокот влезе во мечкин пазар, откако падна за 20 отсто во однос на највисокото ниво во јуни, додека распродажбата на кинеските акции дополнително се интензивира.
Индексот, кој ги следи 300-те најголеми компании на берзите во Шангај и Шенжен, бележи пад десет недели по ред. Само оваа недела загубил 2,6 отсто, покажуваат податоците на LSEG што ги пренесува CNBC. Во четвртокот паднал за повеќе од еден процент.
Што е мечкин пазар?
Мечкин пазар е термин што се користи кога вредноста на берзански индекс или акција ќе падне за најмалку 20 отсто во однос на последниот врв. Таквиот пад обично укажува на песимизам кај инвеститорите и масовна продажба на акции.
Називот потекнува од начинот на кој мечката напаѓа, удирајќи со шепата одозгора надолу. Спротивен поим е „биковски пазар“, кога цените долгорочно растат, бидејќи бикот напаѓа со роговите одоздола нагоре.
Проблеми со прекумерните производствени капацитети
Џордан Цветановски, претседател и директор за инвестиции во „Пела фандс“, за CNBC изјавил дека кинеската берза и понатаму се соочува со структурни проблеми, бидејќи втората најголема економија во светот ги чувствува последиците од повеќегодишното создавање прекумерни производствени капацитети и прекумерните инвестиции.
„Мислам дека Кина навистина се мачи да ги контролира проблемите што ги имаше во минатото поради прекумерното градење капацитети и други фактори“, изјавил Цветановски, посочувајќи дека проблемите ги погодуваат и компаниите во глобално конкурентните индустрии, како што е производството на батерии, иако во тој сектор сè уште гледа одредени можности.
Профитот на кинеските компании расте сè побавно поради острата конкуренција, која ги намали профитните маржи, до степен што мораше да интервенира и владата. Во септември е забележан најслаб раст на индустрискиот профит од почетокот на годината.
Кинеската економија во вториот квартал забележа и најбавен раст во последните повеќе од три години, под притисок на повеќегодишното забавување на пазарот на недвижности и слабата потрошувачка.
Малите инвеститори дополнително го засилуваат падот
Шон Реин, генерален директор на „Чајна маркет рисрч груп“, очекува дополнителен притисок од продажбата поради геополитичката неизвесност, стравувањата од балон поврзан со вештачката интелигенција и сè послабата доверба на потрошувачите.
Според него, нестабилноста дополнително ја засилува големиот број мали инвеститори во Кина, кои во периоди на неизвесност побрзо го напуштаат пазарот.
Според податоците на HSBC, малите инвеститори во Кина учествуваат со 90 отсто во дневното тргување, додека на Њујоршката берза нивниот удел во обемот на тргување изнесува околу 20 до 25 отсто.
„За Кинезите ова е прашање на зачувување на богатството“, изјавил Реин, додавајќи дека инвеститорите сè повеќе избираат побезбедни форми на вложување, како орочените депозити, поради слабите состојби на пазарот на недвижности и на пазарот на трудот.
Сепак, Реин смета дека распродажбата е претерана. Како аргументи ги наведува отпорниот извоз и знаците за закрепнување на цените на недвижностите во најголемите кинески градови.
„Ова во моментов е криза на довербата, а не економска криза“, изјавил тој, прогнозирајќи силно закрепнување на кинеските акции во 2027 година.
Пооптимистички став има и Даниел Жерар, виш стратег во „Стејт стрит маркетс“. Според него, растечките можности на Кина во областа на вештачката интелигенција би можеле повторно да ги привлечат глобалните инвеститори на кинескиот пазар на акции, дури и пред да дојде до закрепнување на профитот на компаниите.
