Volkswagen започна необичен проект во Полска, во кој главната улога не ја имаат луѓето, туку стадо од 100 овци.
Нивната задача е да ја одржуваат тревата под илјадниците соларни панели, со што компанијата истовремено произведува електрична енергија, ги намалува трошоците за одржување и придонесува за заштита на животната средина.
Станува збор за агроволтаичен проект што Volkswagen Poznań го реализира во соработка со компанијата Quanta Energy во својата фабрика во полскиот град Вжешња. Целта е на една локација да се обединат производството на енергија од обновливи извори, сточарството и научноистражувачката работа.
Соларната електрана има инсталирана моќност од 18,3 мегавати, што ја прави една од најголемите индустриски фотоволтаични централи во Европа. Таа годишно произведува доволно електрична енергија за да покрие околу една четвртина од потребите на фабриката на Volkswagen во Вжешња.
Наместо да користи машини за косење, компанијата се одлучила за природен начин на одржување на вегетацијата. За таа цел, на локацијата се донесени 100 овци од автохтоната полска раса „Вјелкополска“, кои слободно пасат меѓу повеќе од 31.000 соларни панели.
На овој начин тревата се одржува на соодветна висина без употреба на специјализирана механизација, додека панелите на овците им обезбедуваат сенка и заштита од дожд, силно сонце и други неповолни временски услови.
Покрај производството на електрична енергија, проектот има и научна компонента. Истражувачи од Универзитетот во Познањ следат како присуството на овците влијае врз биодиверзитетот, квалитетот на почвата, микроклимата и благосостојбата на животните, со цел да утврдат дали овој модел може да стане пример за одржливо управување со големи соларни електрани.
Оваа иницијатива доаѓа во период кога Volkswagen се подготвува за значително намалување на бројот на вработени, со најави за укинување на повеќе од 100.000 работни места во следните осум до девет години. Сепак, вниманието овојпат е насочено кон необичните „работници“ кои секојдневно се грижат за зелените површини околу една од најголемите соларни електрани во Европа.
