Кинеските авиокомпании нарачаа вкупно 95 патнички авиони од европскиот производител Airbus, чија каталошка вредност изнесува околу 17,8 милијарди долари (приближно 15,3 милијарди евра). Со оваа набавка компаниите сакаат да ги прошират своите капацитети и да ги модернизираат флотите со поекономични летала.
Националниот авиопревозник Air China и неговата подружница Shenzhen Airlines ќе набават вкупно 55 авиони, со каталошка вредност од 12,4 милијарди долари (околу 10,7 милијарди евра), пренесува „Ројтерс“.
Air China нарача 15 широкотрупни авиони A350-900, вредни околу 6,09 милијарди долари (5,2 милијарди евра), додека Shenzhen Airlines ќе купи 40 авиони од семејството A320neo, чија каталошка вредност изнесува околу 6,35 милијарди долари (5,5 милијарди евра).
Во меѓувреме, Hainan Airlines соопшти дека ќе набави уште 40 авиони A320neo, чија каталошка вредност достигнува 5,4 милијарди долари (околу 4,6 милијарди евра). Испораката на сите авиони е планирана во периодот од 2028 до 2032 година.
Од Air China наведуваат дека реалната цена ќе биде значително пониска од каталошката, бидејќи Airbus одобрил вообичаени попусти за големи нарачки. Финансирањето ќе биде обезбедено преку комбинација од сопствени средства, банкарски кредити и други извори.
Новите авиони треба да го зголемат вкупниот патнички и товарен капацитет на групацијата Air China за околу 7,1 процент, додека капацитетот на Shenzhen Airlines ќе се зголеми за околу 4,3 проценти.
Дел од новите авиони ќе ги заменат постарите летала што постепено се повлекуваат од употреба. Нарачките доаѓаат во период кога кинеските авиокомпании продолжуваат со обновување и проширување на своите флоти по пандемијата, и покрај притисокот врз профитабилноста поради високите цени на горивото.
