Казахстан во јули за првпат извезе бензин во Русија, испорачувајќи околу 1.000 метрички тони гориво во еден од регионите во централниот дел на земјата, изјавија извори од енергетскиот сектор.
Русија се соочува со недостиг на бензин поради засилените напади со украински беспилотни летала врз рафинерии низ земјата. Поради тоа, руските власти почнале да бараат дополнителни количини гориво од Казахстан и Белорусија, како и да увезуваат бензин по морски пат од Индија, пренесува „Ројтерс“.
Потпретседателот на руската Влада, Александар Новак, во средата изјави дека рускиот пазар во моментов е стабилно снабден со дизел-гориво, по целосната забрана за негов извоз, пренесе агенцијата РИА Новости.
„Имајќи ја предвид одлуката што Владата на Руската Федерација ја донесе минатата недела за забрана на извозот на дизел-гориво, домашниот пазар сега е целосно снабден, а сите потребни количини ќе бидат испорачани до регионите за да се обезбеди непречено одвивање на жетвата“, изјави Новак.
Тој претходно посочи дека Русија летово се соочила со нарушувања во снабдувањето со гориво поради промени во логистичките синџири.
За да ја подобри состојбата, руската Влада презеде повеќе мерки, меѓу кои забрана за извоз на бензин и дизел, воведување даночни олеснувања за увоз на гориво и зголемување на домашното производство, наведува „Ројтерс“.
