Компанијата Lindt & Sprüngli, швајцарски гигант во производството на слатки, беше принудена делумно да се откаже од одлуката за поскапување на своите производи, откако забележа остар пад на продажбата, особено за време на велигденските празници.
Од Lindt потврдија дека општото поскапување од 11,8 проценти на ниво на целата групација било една од главните причини за намалувањето на приходите во првата половина од годината. Падот на побарувачката бил особено изразен на клучните европски пазари, како што се Велика Британија, Германија и Швајцарија.
Покрај повисоките цени, компанијата за послабите резултати го обвини и намалениот број туристи од Азија и Блискиот Исток поради геополитичките нестабилности, што директно се одразило врз продажбата на нивните чоколади во бесцаринските продавници на аеродромите.
„Како одговор на реакцијата на пазарот, ги прилагодивме цените и ги засиливме маркетиншките активности во одредени региони за втората половина од годината“, соопштија од компанијата.
Иако вкупните приходи на компанијата се намалиле за 0,9 проценти, а во Европа за 2,1 процент, реалната количина на продадено чоколадо доживеала драстичен пад од дури 7,5 проценти. Добивката пред оданочување се намалила за 1,5 процент.
Препознатливите златни велигденски зајачиња на Lindt со црвена лента и ѕвонче оваа година останале на многу полици, бидејќи купувачите на зрелите пазари, чувствителни на цените, се одлучиле за поевтини алтернативи.
Извршниот директор на Lindt, Адалберт Лехнер, изјави дека веќе се преземени мерки за закрепнување на обемот на продажбата во текот на 2026 година, со цел да се создадат услови за повторен раст во 2027 година.
Lindt не е единствениот производител што се соочува со растечки трошоци.
Производителите на чоколада ширум светот се соочуваат со рекордни цени на суровото какао, предизвикани од екстремни суши и обилни врнежи во Западна Африка, каде што се одгледува најголемиот дел од оваа суровина.
Додека некои брендови се одлучија за драстично зголемување на цените, други прибегнаа кон таканаречената „шринкфлација“ – намалување на грамажата или на уделот на чистото чоколадо во производите, за да ја задржат привидно истата цена.
Според последните официјални податоци, годишниот раст на цените на чоколадите и слатките изнесува речиси осум проценти, што е повеќекратно над општата стапка на инфлација во повеќето европски земји.
