Новиот британски премиер Енди Барнам во своите први потези се обиде да ја спои помошта за граѓаните со порака до инвеститорите дека владата нема дополнително да ги оптоварува јавните финансии.
Барнам за министер за финансии го назначи Џон Хили, поранешен министер за одбрана и поранешен функционер во Министерството за финансии од времето на владата на Гордон Браун. Според аналитичарите, со овој избор сакал да покаже дека новата влада ќе остане посветена на намалување на британскиот јавен долг.
Веќе следното утро владата објави дека од октомври, во период од најмалку шест месеци, ќе го укине данокот на потрошувачката на електрична енергија за домаќинствата. Се проценува дека просечното домаќинство ќе заштеди околу 45 фунти годишно, а трошокот за оваа мерка ќе се покрие со откажување од планот за воведување дигитален идентитет.
Барнам ја презема функцијата во период кога британската економија од 2009 година наваму растела со просечна стапка помала од 1,5 проценти годишно, што е двојно побавно отколку во 15-те години пред финансиската криза во 2008 година.
Во исто време, државниот долг надминал 95 проценти од бруто-домашниот производ, додека каматите за сервисирање на долгот во фискалната година заклучно со април достигнале 111,2 милијарди фунти, односно 8,3 проценти од вкупната државна потрошувачка.
Дополнителен товар за буџетот претставува и обврската до 2035 година издвојувањата за одбраната да се зголемат на 3,5 проценти од БДП. Според проценките на Институтот за фискални студии, тоа би чинело околу 36 милијарди фунти годишно, или приближно 500 фунти по жител.
Економистката Оливија О’Саливан од институтот „Чатам хаус“ предупреди дека овие ограничувања се длабоко структурни. Поранешниот економист на „Голдман Сакс“, Џим О’Нил, оцени дека на Велика Британија ѝ е потребен лидер кој е подготвен за „нешто храбро и поинакво“.
Засега, Барнам нуди општ план за реиндустријализација на земјата, пренасочување на инвестициите од Лондон кон другите региони на Велика Британија, зголемена изградба на јавни станови и поголема поддршка за малите и средните претпријатија.
Сепак, без побрз економски раст, владата тешко ќе може да го избегне изборот меѓу зголемување на даноците или намалување на финансирањето на популарни јавни услуги, како што е Националната здравствена служба.
