Банките во еврозоната умерено ги заострија критериумите за одобрување кредити за компаниите и населението во вториот квартал од 2026 година, главно поради зголемените економски ризици, геополитичките и енергетските неизвесности, како и поради намалената подготвеност на банките да преземаат ризик.
Според резултатите од јулското истражување на Европската централна банка (ЕЦБ) за кредитната активност на банките, седум проценти од анкетираните банки пријавиле заострување на критериумите за одобрување кредити и кредитни линии за компаниите.
Критериумите се заострени и кај станбените кредити, што го пријавиле девет проценти од банките, како и кај потрошувачките и другите кредити за населението, каде што заострување забележале нето 12 проценти од банките.
Банките очекуваат условите за кредитирање дополнително да се заострат во третиот квартал од годинава во сите категории на кредити.
Заострени се и конкретните услови што им се нудат на клиентите, пред сè поради повисоките каматни стапки. Истовремено, зголемен е уделот на одбиени барања за кредити, особено кај потрошувачкото кредитирање.
Побарувачката на компаниите за кредити и кредитни линии во вториот квартал благо се зголемила за три проценти, иако банките претходно очекувале нејзин пад од 10 проценти.
Во третиот квартал банките очекуваат натамошен пад на побарувачката за станбени кредити, додека побарувачката за потрошувачки кредити би требало да остане непроменета.
