Акциите на кинескиот производител на мемориски чипови CXMT забележаа огромен раст уште на првиот ден од тргувањето на берзата во Шангај, по најголемата иницијална јавна понуда на акции (IPO) во Кина во последните неколку години.
Вредноста на акциите порасна за повеќе од 460 проценти, со што компанијата достигна пазарна капитализација од околу 3,3 трилиони јуани (околу 415 милијарди евра). Така, CXMT стана највредната компанија листирана на некоја од кинеските берзи, иако сè уште е помала од јужнокорејските гиганти Samsung Electronics и SK Hynix, како и од американската компанија Micron.
Во рамки на иницијалната јавна понуда, компанијата обезбеди најмалку 8,6 милијарди долари, продавајќи акции по цена од 8,66 јуани. Ова е втората најголема IPO-трансакција во историјата на Кина, веднаш зад излегувањето на Agricultural Bank of China на берзата во 2010 година.
CXMT е основана во 2016 година во градот Хефеј и денес е еден од најголемите светски производители на DRAM мемориски чипови, кои се користат во сервери за вештачка интелигенција, автомобили, паметни телефони и компјутери.
Брзиот раст на компанијата е поттикнат од експанзијата на вештачката интелигенција, но и од кинеската стратегија за технолошка самостојност, поради американските ограничувања за извоз на напредна опрема за производство на чипови.
Аналитичарите оценуваат дека CXMT има клучна улога во кинеските планови за развој на технологии базирани на вештачка интелигенција, особено затоа што Кина, поради американските санкции, не може да ги увезува најнапредните HBM мемориски чипови.
Деловните резултати на компанијата значително се подобрија оваа година. Во првите три месеци од 2026 година приходите достигнале 50,8 милијарди јуани (7,4 милијарди долари), што е повеќе од седум пати повеќе во споредба со истиот период лани, благодарение на силната глобална побарувачка за мемориски чипови, предизвикана од забрзаната примена на вештачката интелигенција.
Големата побарувачка доведе и до недостиг на мемориски чипови на светскиот пазар, што резултираше со повисоки цени на одредени компјутери и паметни телефони.
