Администрацијата на градоначалникот на Њујорк, Зохран Мамдани, претстави план за отворање градски продавници за прехранбени производи со цел да им се олесни на работничките семејства набавката на основните животни намирници.
Според иницијативата, цените на основната потрошувачка кошничка ќе бидат намалени за 30 проценти, додека останатите производи ќе се продаваат по редовни пазарни цени.
Се проценува дека оваа мерка ќе му донесе заштеда од околу 90 долари месечно на едно просечно домаќинство, односно приближно 1.000 долари годишно.
Главните цели на иницијативата се намалување на трошоците за живот и борба против недостигот на храна во одделни градски населби.
Со попуст од 30 проценти ќе се продаваат овошје и зеленчук, тестенини, месо и морски плодови, леб, јогурт, ориз, грав и други основни прехранбени производи.
Планирано е отворање на пет градски продавници, а градските власти за проектот издвоиле 70 милиони долари од капиталниот буџет.
Градот ќе ги обезбеди просториите и ќе ги покрие трошоците за инфраструктурата, додека секојдневното работење ќе го води приватен оператор избран преку јавен повик.
„Ниту еден њујорчанец не треба да се грижи дали ќе може да си дозволи да го прехрани своето семејство“, изјави Мамдани, нагласувајќи дека проектот претставува исполнување на едно од неговите клучни предизборни ветувања.
Од друга страна, критичарите и здруженијата на мали стопанственици предупредуваат дека продавниците управувани од градот би можеле да го загрозат опстанокот на малите приватни продавници.
Градоначалникот ги отфрли овие стравувања, истакнувајќи дека градските продавници нема да се натпреваруваат со малите трговци во сегментите што им носат најголем профит. Затоа, во нив нема да се продаваат цигари, лотариски производи и готови оброци.
