Рускиот милијардер Михаил Фридман покрена меѓународна арбитражна постапка против Холандија, барајќи отштета поради пропаста на неговата Амстердамска трговска банка (Amsterdam Trade Bank).
Тој, исто така, бара да му биде вратена контролата врз дел од имотот што му беше блокиран по воведувањето на санкциите од Европската Унија.
Фридман, кој има руско и израелско државјанство, ја покренал постапката пред Постојаниот арбитражен суд во Хаг. Своето барање го темели на билатералниот договор за заштита на инвестиции меѓу Холандија и поранешниот Советски Сојуз од 1989 година, пренесува NL Times.
Милијардерот ја обвинува и Холандската централна банка (DNB) дека вршела притисок врз Амстердамската трговска банка уште по соборувањето на авионот MH17 во 2014 година.
Поради санкциите, Фридман ја изгубил контролата врз британскиот синџир на дрогерии Holland & Barrett, уделите во рускиот трговски синџир X5 и телекомуникациската компанија Veon, како и врз друг дел од својот имот.
Тој бара повторно да добие контрола врз своите средства, како и исплата на отштета, чиј износ засега не е прецизиран.
Паралелно, Фридман води и други меѓународни арбитражни постапки.
Пред арбитражното тело на Светска банка бара околу една милијарда долари од Украина поради национализацијата на една банка, а во 2024 година покренал и постапка против Луксембург во вредност од дури 16 милијарди долари.
