И покрај неизвесните економски перспективи, растечките цени на енергенсите и глобалните тензии, индустријата на крстарења продолжува да бележи рекордни резултати.
Минатата година ширум светот биле реализирани повеќе од 37 милиони океански крстарења – најмногу досега, покажуваат податоците на Меѓународното здружение на компании за крстарења (CLIA).
Организацијата, која претставува повеќе од 95 проценти од светската понуда на крстарења, очекува бројот на патници дополнително да расте. Според нивните прогнози, годинава ќе бидат продадени повеќе од 38 милиони крстарења, а до 2029 година бројката би можела да надмине 42 милиони.
Една од причините е тоа што многу луѓе, особено во Германија, и покрај послабите економски изгледи, најмалку штедат кога станува збор за годишниот одмор.
Главниот економист на инвестициската компанија Scalable Capital, Кристијан Рел, објаснува дека во последните години се забележува промена во навиките на потрошувачите.
„Луѓето денес повеќе штедат на материјални работи – мебел, автомобили или облека – а повеќе инвестираат во искуства. Одморот е едно од највредните искуства што можат да си го дозволат“, вели тој.
Според Рел, една од најголемите предности на крстарењата е нивниот концепт.
„Тоа е all-inclusive пакет. Откако ќе го изберете бродот, можете целиот одмор да го поминете на него, а речиси сè е однапред организирано“, истакнува тој.
Практичноста е главниот адут – храната, забавата, велнес и спортските содржини се веќе вклучени, додека дополнителните услуги, како организирани екскурзии на копно, се избор на патниците. Без разлика на дестинацијата, вашиот „пловечки хотел“ секогаш патува со вас.
Денес постојат крстарења за речиси сечиј вкус – од економични до ултралуксузни, од мали бродови до гиганти што примаат повеќе од 7.500 патници. Има понуди за семејства, самци, љубители на поп или хеви-метал музика, забавни крстарења, како и културни тури.
Американците се светски шампиони во крстарења
Најголем број патници на крстарења доаѓаат од САД. Според CLIA, минатата година Американците реализирале 20,6 милиони океански крстарења, што е за 7,5 проценти повеќе во споредба со претходната година.
На второто место се Германците. Во 2025 година тие реализирале речиси три милиони океански крстарења, што претставува раст од 10 проценти на годишно ниво.
За компаниите што организираат крстарења овој бизнис е исклучително профитабилен. Royal Caribbean Group, една од водечките светски компании во оваа индустрија, минатата година оствари нето-добивка поголема од четири милијарди долари.
Рел објаснува дека цените на билетите најчесто ги покриваат основните фиксни трошоци.
„Билетите можат да бидат релативно евтини, особено кога на бродот има илјадници патници. Вистинскиот профит доаѓа од дополнителните услуги – екскурзии, специјализирани ресторани, спа-центри, казина и алкохолни пакети“, вели тој.
Тој додава дека бродските компании имаат голема предност во однос на хотелите на копно.
„На бродот компанијата практично има монопол. Без разлика дали плаќате за ресторан, купувате сувенири или дури уметнички дела, парите на крајот завршуваат кај истата компанија. Тоа е исклучително профитабилен деловен модел“, заклучува аналитичарот.
