Новиот мандатар на српската влада, професорот Ѓуро Мацут е роден во Белград, а исто така дипломирал, магистрирал и докторирал на Медицинскиот факултет во Белград.
Мацут, предлог на претседателот на Србија, Александар Вучиќ, е специјализиран за репродуктивна медицина и биологија на Универзитетот во Женева и Светската здравствена организација.
Од 2015 до 2023 година бил член на Стручниот совет на Универзитетскиот клинички центар на Србија.
Мацут е заменик-директор на Клиниката за ендокринологија, дијабетес и метаболички болести на Универзитетскиот клинички центар на Србија.
Тој е редовен професор на Медицинскиот факултет на Универзитетот во Белград, на Катедрата за интерна медицина и визитинг професор на Медицинскиот факултет на Универзитетот во Атина и на Медицинскиот факултет на Универзитетот во Скопје.
Мацут е претседател на Српското друштво за репродуктивна ендокринологија. Тој е член на Извршниот одбор на Европското ендокринолошко друштво и претседател на Финансискиот комитет на ова друштво.
Покрај тоа што е автор на преку 140 оригинални трудови објавени во рецензирани меѓународни списанија, професорот Мацут е и помошник-главен уредник и член на уредувачките одбори на повеќе меѓународни списанија од областа на медицината.
Со указ на претседателот на Република Србија, за неговата работа и придонес во Србија, во 2024 година е одликуван со Орден Ѕвезда на Караѓорѓе од втор степен.
Ѓуро Мацут доаѓа на премиерското место по оставката на неговиот претходник, Милош Вучевиќ, кој замина од позицијата веднаш по нападот на студентите во Нови Сад, во склоп на неодамнешните протести и демонстрации кои се случуваа во соседна Србија.
