Повеќето претставници на американските Федерални резерви (ФЕД) сметаат дека до крајот на годината веројатно ќе биде потребно уште едно зголемување на каматните стапки за да се ограничи инфлацијата, која повеќе од пет години е над целното ниво на централната банка.
Сепак, во записникот од состанокот не е наведено кога точно би можело да следува новото зголемување. Се посочува дека упорно високите цени и стабилниот пазар на трудот би можеле да го оправдаат дополнителното зголемување на референтната каматна стапка, објави Си-Ен-Би-Си.
ФЕД повторно ќе одлучува за каматните стапки на 28 октомври, а потоа и на 9 декември.
„Повеќето учесници оценија дека уште едно зголемување на целниот распон на каматната стапка на федералните фондови веројатно ќе биде соодветно до крајот на годината“, се наведува во записникот, со напомена дека одлуките ќе зависат од новите економски податоци и процената на ризиците.
ФЕД на септемврискиот состанок едногласно ја зголеми референтната каматна стапка за 0,25 процентни поени, што беше прво зголемување од 2023 година.
Од 18 претставници на Федералниот комитет за операции на отворениот пазар (ФОМЦ) кои доставиле проекции, 16 очекувале уште едно зголемување до крајот на годината. Како група, тие предвиделе дека во текот на 2027 година нема да има нови зголемувања.
Сепак, поновите податоци за инфлацијата и изјавите на одделни претставници укажуваат дека зголемувањето на каматите веќе на октомврискиот состанок не е извесно.
Базичниот индекс на расходите за лична потрошувачка (ПЦЕ), кој ФЕД го користи како главен показател за инфлацијата, во август пораснал за 3 отсто на годишно ниво, додека вкупната инфлација изнесувала 3,4 отсто.
Двата показатела и понатаму се над целта на ФЕД од 2 отсто, но биле пониски од очекувањата.
Претставниците на ФЕД оцениле дека постои ризик инфлацијата да остане висока, додека пазарот на трудот е близу до максимална вработеност, а економскиот раст забрзува.
Повисоките каматни стапки биле оценети како заштитна мерка од можноста зголемената побарувачка или новите нарушувања во снабдувањето дополнително да ја поттикнат инфлацијата.
Во меѓувреме, приносите на американските државни обврзници значително пораснале и достигнале нивоа невидени од 2002 година.
Претставниците растот на приносите го поврзале со очекувањата за повисоки каматни стапки на ФЕД, инвестициите во вештачка интелигенција и стабилниот економски раст. Економистите на централната банка ја посочиле и неизвесноста поврзана со најавата и спроведувањето на програмата за откуп на државни обврзници на американското Министерство за финансии.
Новите податоци на њујоршкиот огранок на ФЕД, објавени во средата, покажале дека очекувањата на потрошувачите за растот на цените во следните 12 месеци го достигнале највисокото ниво од мај 2023 година, што дополнително ја отежнува процената на идната монетарна политика.
