Италија е подготвена да разгледа дополнително ослободување на нафта од своите стратешки резерви, доколку другите европски земји ги исполнат обврските што ги презеле во рамките на координираниот план на Меѓународната агенција за енергија (ИЕА).
Ова денеска го изјави италијанскиот министер за енергетика, Џилберто Пикето.
Рим целосно ја исполнил обврската од мартовскиот план на ИЕА, кој предвидувал ослободување на 10 милиони барели нафта, објави Ројтерс.
Количеството било обезбедено од залихите на нафтените компании, а не од државните стратешки резерви.
Пикето изјави дека Италија би можела да учествува во дополнително ослободување на резервите доколку и другите европски земји покажат подготвеност да ги исполнат преземените обврски.
Италија претходно нагласи дека секоја нова одлука треба да биде усогласена со европските партнери и со ИЕА.
ИЕА во средата соопшти дека ќе го забрза ослободувањето на нафтените залихи договорено во март, со приоритет на дизелот. Според процените на агенцијата, во рамките на веќе постојниот план на пазарот треба да бидат пласирани уште околу 100 милиони барели нафта.
Најавата следуваше откако земјите од Групата седум (Г7) минатата недела се договорија во следните четири месеци да ослободат 100 милиони барели сурова нафта и дизел. Тие ги повикаа членките да го забрзаат пласирањето на дизелот поради нарушувањата во снабдувањето и рекордно високите цени на горивата.
Франција во средата најави ослободување на 10 милиони барели дизел од своите резерви, додека Европската Унија соопшти дека ослободувањето на нафта треба да остане во рамките на количествата договорени во март.
