Долгот на американскиот земјоделски сектор достигна рекордни 605 милијарди долари, односно околу 522 милијарди евра, покажуваат процените на Министерството за земјоделство на САД (УСДА).
Долгот на секторот е повеќе од двојно зголемен од 2000 година, кога изнесувал околу 300 милијарди долари, објави Ројтерс.
Сепак, агенцијата предупредува дека вистинската задолженост може да биде значително поголема, бидејќи официјалната статистика не ги опфаќа целосно кредитите што земјоделците ги добиваат од добавувачи, задруги, производители на опрема и други нетрадиционални кредитори.
За 2026 година, УСДА предвидува вкупниот долг на земјоделскиот сектор да достигне 605,1 милијарда долари. Од оваа сума, 399 милијарди долари се долг поврзан со недвижности, додека преостанатите 206,1 милијарда долари се однесуваат на други задолжувања.
Ројтерс наведува дека земјоделците сè почесто користат алтернативни извори на финансирање, особено во периоди кога банките ги заоструваат условите за одобрување кредити.
Според податоците собрани од агенцијата во разговори со повеќе од 52 комерцијални земјоделци од седум сојузни држави на Средниот Запад и југот на САД, повеќето од нив имале меѓу седум и 10 различни кредитни линии, додека некои имале повеќе од 30.
Едно семејство од Ајова наведило дека користело дури 42 кредитни линии, главно затоа што продавачите на земјоделска опрема барале посебни финансиски аранжмани при купување или лизинг на нови машини.
Дополнителен проблем е намаленото учество на земјоделците во истражувањето на УСДА за управување со ресурсите на фармите. Одѕивот паднал од околу 68 отсто во 2009 година на приближно 33 отсто во 2025 година.
Поради тоа, УСДА започнува нови истражувања со цел попрецизно да го измери обемот на нетрадиционалното кредитирање и да ги процени можните последици од финансиските притисоци врз земјоделството за пошироката американска економија.
