За денеска е закажан состанок со производителите и со дистрибутерите, на кој ќе се разговара за продажните и набавните цени на основните производи. Како што рече во четвртокот министерот за економија и труд Бесар Дурмиши по седницата на Економско-социјалниот совет, контролите што ги спроведе Државниот пазарен инспекторат на над 700 производи покажале дека во периодот од мај 2025 година до мај 2026 година просечните набавни цени кај основните прехранбени производи и средствата за хигиена се зголемени за 2,66 проценти, а просечните продажни цени пораснале за 4,56 проценти.
– Тоа значи дека дел од растот на малопродажните цени на прехранбените производи и другите производи се зголемува поради профитната бруто-маржа што одредени трговци ја зголемиле оваа година, односно кога се намалиле набавните цени, тие не ги намалиле своите цени – рече Дурмиши.
Дурмиши посочи дека инфлацијата за јуни е намалена за 0,5 проценти, при што цените на храната и безалкохолните пијалаци се намалени за 1,1 процент, а на транспортот за 1,6 процент.
- Од друга страна, најновата анализа што е направена, исто така за периодот март – јуни 2026 година, покажува поинаков тренд кај производителите, односно набавните цени пораснале за речиси 2,04 проценти, а продажните цени се зголемиле за само 0,16 проценти. Тоа значи дека трендот на зголемување на профитната бруто-маржа крајните месеци е намален и цените се во стабилна фаза. И за една година се зголемила само профитната бруто-маржа од страна на трговците, но тоа не е за овие крајни месеци. Крајните месеци, од март до јуни годинава, имаме само 0,16 проценти зголемување на профитната бруто-маржа, што покажува дека е во стабилна состојба – рече Дурмиши.
