Шведската модна компанија H&M соопшти во својот полугодишен извештај дека годинава ќе затвори 170 физички продавници ширум светот за да го приспособи своето работење на актуелните пазарни услови. Истовремено, компанијата најави отворање на околу 90 нови продажни локации.
Во извештајот се наведува дека во периодот до 31 мај бројот на продавници на H&M е намален за 128, од 4.166 на 4.038, што претставува пад од три проценти.
Најголем број затворања се регистрирани во Азија, Океанија и Африка, каде што се затворени 97 продавници.
Во Западна Европа се затворени 20 продавници, во нордиските земји 17, а во Источна Европа уште четири, пренесува британскиот „Мирор“.
Покрај затворањето на продавници, H&M започна и со укинување на поединечни брендови во рамките на групацијата. Во изминатиот период трајно се затворени сите преостанати продавници на брендот Monki, кој е интегриран во сродниот бренд Weekday.
Од компанијата наведуваат дека постојано ја преоценуваат својата мрежа на продавници со цел да одговорат на потребите на потрошувачите и да понудат подобро искуство при купувањето, како во физичките продавници, така и преку интернет.
H&M се соочува со предизвици како што се растот на онлајн трговијата и сè посилната конкуренција од кинеските платформи Temu и AliExpress, додека истовремено работи на намалување на оперативните трошоци, наведува „Мирор“.
