Индија и Северна Македонија најавија продлабочување на билатералната соработка со посебен акцент на туризмот, трговијата, инвестициите и подобрувањето на економските односи.
За време на официјалните разговори меѓу претставниците на двете земји беше истакнат потенцијалот за зголемување на туристичката размена, подобра авионска поврзаност и интензивирање на деловните контакти. Дополнително, беше нагласена потребата од поголема соработка меѓу компаниите и институциите со цел да се отворат нови можности за инвестиции и развој на заеднички проекти.
Соговорниците оценија дека постои значителен неискористен потенцијал во областите на туризмот, информатичката технологија, образованието, фармацијата и обновливите извори на енергија, како и дека зајакнувањето на економските врски ќе придонесе за поголема трговска размена и нови можности за бизнис заедницата во двете земји.
Растојанието меѓу Македонија и Индија да не го мериме во километри, туку преку силата на нашата соработка и резултатите што заеднички ги постигнуваме, порача министерот за дигитална трансформација Стефан Андоновски во обраќањето од Македонско-индискиот бизнис форум што се одржа денеска во Скопје, во присуство на претседателките Гордана Сиљановска-Давкова и Друпади Мурму.
-Дигитализацијата ги намалува растојанијата, ги намалува трошоците, ја зголемува довербата и обезбедува границите да не да не станат препрека за развојот на знаењето и споделувањето на знаењето. Нашите земји имаат заедничка врска преку нашата хероина Мајка Тереза, но денешниот деловен форум е можност да се претвори добрата волја во партнерство. Индија покажа дека дигиталната трансформација може да се гради како јавна инфраструктура, рече Андоновски.
Тој ги претстави можностите за продлабочување на партнерството во областа на дигиталната трансформација, а како конкретен прв чекор, тој го претстави предлог-проектот за унапредување на македонскиот Централен регистар на население, за кој е предложена поддршка од Фондот за развојно партнерство Индија–ОН.
-Проектот ќе овозможи поврзување на клучните матични евиденции, подобрување на квалитетот на податоците со примена на вештачка интелигенција и развој на аналитички алатки за креирање политики засновани на докази, посочи Андоновски.
Тој ги повика индиските компании и инвеститори да ги препознаат можностите што ги нуди Македонија и да инвестираат во дигитализација, вештачката интелигенција, сајбер-безбедноста, финансиските технологии, Cloud решенија и дигиталните вештини.
-Македонија располага со стручен кадар, конкурентна деловна средина и стратешка положба што го поврзува Западен Балкан со поширокиот европски пазар. Целта е јасна: нови инвестиции и партнерства, побрзи услуги, помалку административни обврски и конкретни придобивки за граѓаните и компаниите, нагласи министерот во обраќањето од Македонско-индискиот бизнис форум.
