Јапонскиот производител на автомобили Нисан Мотор објави дека во првите шест месеци од фискалната година, од април до септември, забележал загуба од 221,92 милијарди јени (околу 1,25 милијарди евра) по падот на продажбата на возила и воведувањето на високите американски царини.
Ова е голем пад во споредба со истиот период минатата година, кога компанијата оствари профит од 19,22 милијарди јени, објавува агенцијата Кјодо.
Приходите за шесте месеци изнесуваа 5,58 трилиони јени, што е намалување од 6,8 проценти во однос на истиот период од претходната година, додека оперативната добивка се намали од профит од 32,91 милијарди јени на загуба од 27,65 милијарди јени.
Глобалната продажба на автомобили на Нисан Мотор Ко. се намали за 7,3 проценти на 1,48 милиони возила, а падот е особено изразен на пазарите во Кина и Јапонија.
Јапонската компанија објави дека продолжува со значително реструктуирање, што подразбира намалување на бројот на фабрики од 17 на 10 и планира да елиминира околу 20.000 работни места до фискалната 2027 година.
Процесот на консолидација веќе вклучува фабрики во Аргентина, Јапонија, Индија и Мексико, како и заедничка фабрика со Мерцедес-Бенц во Мексико, каде што производството ќе биде суспендирано на крајот на ноември.
Нисан, исто така, ќе го продаде своето седиште во Јокохама како дел од мерките за штедење, а потоа ќе го издаде под наем, објавувајќи еднократна добивка од 73,9 милијарди јени.
Претседателот и извршен директор на Нисан Мотор, Иван Еспиноза, рече дека процесот на намалување на работната сила се одвива „според планот“ и изрази увереност дека новите мерки ќе помогнат продажбата да се опорави во втората половина од фискалната година.
Нисан Мотор ја задржа својата годишна проценка на приходите од 11,7 трилиони јени, но исто така очекува оперативна загуба од 275 милијарди јени до крајот на март 2026 година.
