Кога на почетокот на 2023 година стапија на сила законските измени со кои неделата беше прогласена за неработен ден, работодавачите предупредија дека тоа може на крајот да резултира со отпуштања.
Новата власт дури им вети на бизнисмените, работодавачите и на стопанските комори дека ќе го преиспита законот за недела неработен ден со цел да ги „спаси“ работниците од отпуштања.
Во меѓувреме, недостигот на квалитетна работна сила на пазарот на трудот поради забрзаниот процес на исселување на граѓаните ги принуди компаниите освен да го одврзат ќесето за повисоки плати, да нудат и одредени бонуси и привилегии кои ги немало ниту во бивша Југославија кога работниците уживале големи права.
За разлика од порано на огласите за работа кога стоеја само обврските на работникот, работното време и потребните и некогаш непотребни квалификации, сега огласите се како рекламни билборди.
Новите огласи содржат висина на плата, конкретни бонуси кои наводно се лесно остварливи, одредени привилегии, а се оди дотаму што се нуди и висока плата за почетник без искуство, како што е случајот со ланците супермаркети.
Најголемите маркети во Македонија како„Кам маркет“ за продавачи во Скопје нудат 28.000 денари почетна плата со или без искуство која со додатоци и бонуси стигнува до 31.000 денари, а во внатрешноста на земјата платите се од 25 до 28 илјади денари.
Маркетот со најголем раст за 2023 година, „Стокомак“ во трката да биде најдобар, за касиер нуди почетна плата од 32.000 денари со договор за вработување без пробен период, 5.000 денари празничен (верски ) бонус за Божиќ и Рамазан Бајрам и можност за заработка до 35.000 денари.
Речиси сите супермаркети и поголеми фабрики нудат регрес за годишен одмор (К-15) најмалку двапати поголем од законскиот минимум кој за 2023 беше 15.000 денари, а некои од нив нудеа и по 50.000 регрес. „Стокомак“ исплаќа 43.000 денари К-15 по вработен што е меѓу највисоките регреси кои ги исплаќаат компании кои работат во нашата земја.
Неколку компании нудат слободни денови за роденден, пакети за новороденче, училишен пакет производи, ваучери за склучен брак, ваучер за спортска опреми, картички за спорт и попусти за одмор во туристичките места ширум земјава.
Платено колективно осигурување веќе е во минимумот на понудата, некаде се нуди и приватно здравствено осигурување. Најбрзорастечка мотивациска мерка која ја донесоа странските ИТ компании во Македонија и тој тренд го следеа македонските фирми е бонусот за препорачан пријател за работа.
За возачите и магацинските работници пак, секоја компанија во своите огласи објавува дека прекувремените часови ги плаќа повисоко што пак им е законска обврска на работодавачите.
„Кам маркет“ за потребите на своите магацини и снабдувањето во маркетите објави огласи за возачи на камион со „Ц“ категорија.
Условите се: плата до 60.000 денари (по завршена обука), платен секој прекувремен час и ноќна работа, регрес речиси три пати поголем од законски пропишаниот, слободен ден за роденден, пакет производи за верски празници согласно вероисповеста.
Податоците покажуваат дека од околу 7.600 слободни работни места во Агенцијата за вработување повеќе од 50 отсто се во трговијата и затоа се нудат вакви бенефиции за да се најдат работници.
Според искуствата на вработените, но и според огласите, едно работно место обично опфаќа повеќе работни позиции (на пример, касиер, примач, одржувач на хигиена, да реди производи), се бара работење во смени и работа во сабота, а во големите трговски центри и во недела.
