Грција воведе доброволна шестдневна работна недела во одредени индустрии за да го поттикне економскиот раст и да ја зголеми продуктивноста.
Таа се одлучи на тој потег и покрај противењето на синдикатите кои сметаат дека со овој потег нема да се реши проблемот со недостигот на работна сила во земјава.
Според грчките власти, шестдневната работна недела се однесува само на приватните бизниси во Грција кои обезбедуваат услуги 24 часа на ден. Како дел од продолжената работна недела, персоналот во избраните индустрии и производствени погони ќе има можност да работи дополнителни два часа дневно или дополнителни осумчасовни смени, со компензација од 40 отсто од редовната дневна плата, пишува Гардијан.
Грчката влада на чело со премиерот Киријакос Мицотакис вели дека споменатата мерка, која стапи на сила вчера, е неопходна поради намалувањето на населението и недостигот на квалификувани работници во Грција.
Се проценува дека околу 500.000 млади, образовани Грци ја напуштиле земјата од почетокот на должничката криза што избувна кон крајот на 2009 година, а Мицотакис оваа демографија ја нарече „темпирана бомба“. Синдикатите жестоко се спротивставија на оваа мерка која ја означија како „варварска“ во време кога некои европски земји размислуваат во спротивна насока и експериментираат со четиридневна работна недела.
„Овие мерки беа усвоени од страна на влада која идеолошки е посветена на создавање сè поголем профит за капиталот. Подобрата продуктивност доаѓа со подобри работни услови, подобар квалитет на живот за вработените, а тоа, сега знаеме, е помалку работни часови, а не повеќе“, рече членот на извршниот одбор на Синдикатот на државните службеници Адеди, Акис Сотиропулос.
