Холандија поседува 612 тони злато, чија вредност надминува 72 милијарди евра, но нема јасен договор меѓу Министерството за финансии и централната банка за тоа како би се користеле резервите во случај на голема финансиска криза или војна.
Според истражување на холандскиот Државен ревизорски суд, Министерството за финансии нема доволно информации за управувањето со ова богатство, иако златните резерви се сметаат за еден од важните столбови на националната финансиска безбедност.
Со златото управува Холандската централна банка, а резервите се чуваат во трезори во Њујорк, Отава, Лондон и во холандскиот град Зајст.
Ревизорите утврдиле дека Министерството во голема мера му го препушта надзорот на централната банка и ретко бара дополнителни информации за начинот на кој се чува и контролира златото.
Дилема што би се случило со златото во случај на војна
Златните резерви се сметаат за заштита во периоди на големи финансиски потреси, бидејќи можат да ја задржат својата вредност и кога националните валути, акциите и другите финансиски инструменти губат вредност.
Но, токму во такво сценарио Холандија нема однапред усогласен план за постапување со резервите.
Една од можностите е продажба на дел од златото, при што средствата би можеле да се пренасочат кон државниот буџет. Другата е резервите да останат недопрени и да продолжат да служат како гаранција за стабилноста на финансискиот систем.
Одлуките ги носи централната банка, која има законски загарантирана независност од владата.
Прашања и за златото што се чува во странство
Ревизорите посочуваат дека постојат и недоволно јасни механизми за надзор над златото што се наоѓа надвор од Холандија.
Централната банка врши проверки, но надворешниот ревизор не учествува директно во физичките контроли во странските трезори. Наместо тоа, добива потврди од странските централни банки дека златото се наоѓа таму.
Сепак, ревизорскиот извештај не укажува дека дел од златото недостасува, туку дека Министерството за финансии нема доволно увид во начинот на кој се спроведуваат контролите.
Холандскиот министер за финансии Елко Хајнен изјавил дека има доверба во централната банка и дека во нормални околности нема потреба од постојана размена на дополнителни информации.
Тој оценил дека начинот на управување со златните резерви придонесува за отпорноста на холандската економија, особено во услови на зголемени геополитички тензии.
Ревизорите, сепак, сметаат дека независноста на централната банка не треба да значи дека државата ќе има ограничен увид во управувањето со богатство вредно повеќе од 72 милијарди евра.
