Полскиот премиер Доналд Туск повторно се пошегува на сметка на поранешниот унгарски премиер Виктор Орбан, овој пат по приведувањето на неговиот брат и пронаоѓањето милиони закопани во шума во истрагата против поранешен министер на Орбан.
„Пред неколку дена, братот на Орбан беше приведен во случај на криумчарење луѓе, а вчера во шума беа пронајдени 20 милиони долари што ги закопал еден од министрите на Орбан. Драг Викторе, отсекогаш сум се восхитувал на твојата креативност, но сега морам да кажам дека сум импресиониран како никогаш досега“, напиша Туск на социјалната мрежа X.
Туск се осврна на два случаи од последните неколку недели. Арон Орбан, помладиот брат на поранешниот премиер, беше приведен на 9 ноември во рамки на истрага за шема со визи за државјани на Виетнам. Виктор Орбан тогаш порача дека тој е вистинската цел на истрагата, а неговиот брат само пион.
Унгарската Национална канцеларија за враќање и заштита на имотот (NVVH) на 12 и 13 ноември, во истрагата против Миклош Сештак, министер за национален развој во владата на Орбан од 2014 до 2018 година, заплени повеќе од пет милијарди форинти, 2,66 милиони евра и 1,26 милиони долари во готовина.
Парите биле закопани во шуми и скриени во земјоделски објекти, магацини, куќа и сеф. Премиерот Петер Маѓар ја процени вкупната сума на повеќе од шест милијарди форинти.
„Или Будимпешта, или затвор“
Ова не е првпат Туск да го исмева Орбан на социјалните мрежи. По посетата на Орбан на Москва во јули 2024 година, тој праша дали некој се чувствува побезбедно по разговорот меѓу Орбан и Владимир Путин за „повоената европска безбедносна архитектура“.
Додаде дека историјата не се повторува, но често се римува.
Во октомври 2025 година, под фотографија на Орбан со поранешниот полски министер за правда Збигњев Зиобро, против кого во Полска се води истрага, Туск остави коментар: „Или Будимпешта, или затвор“.
Еден месец подоцна, кога Орбан побара прекин на помошта за Украина, Туск напиша дека не е изненадување што Зиобро и неговиот поранешен заменик Марчин Романовски засолниште нашле токму во Будимпешта.
„Руси, одете си дома“
Во февруари оваа година, во пресрет на унгарските избори, Туск си поигра со презимето на противникот на Орбан, Петер Маѓар, прашувајќи го Орбан како на неговиот јазик се кажува „унгарска пролет“.
По поразот на Орбан на 12 април, објави: „Повторно заедно! Славна победа, драги пријатели!“, а на унгарски додаде „Ruszkik haza!“ („Русите, одете си дома“), слоган од Унгарската револуција во 1956 година.
Две недели подоцна, на самитот на ЕУ во Никозија, на кој Орбан не присуствуваше, Туск им изјави на новинарите дека за првпат по многу години во салата нема Руси.
Орбан претходно го нарече Туск еден од најгласните поттикнувачи на војна во Европа, а во интервју за полскиот неделник „Sieci“ во 2025 година изјави дека Туск го мрази.
