Унгарската Национална канцеларија за враќање и заштита на имотот (NVVH) објави нова видеоснимка од огромната количина пари запленета во случајот со поранешниот министер во владата на Виктор Орбан, Миклош Шештак.
Од агенцијата соопштија дека снимката го прикажува паричниот износ што бил сместен во трезор, а станува збор за 5.071.632.000 унгарски форинти, 2.658.350 евра и 1.257.100 американски долари.
Парите, според претходните информации, биле закопани во шуми, сокриени во различни објекти и станбени згради, како и чувани во сеф на изолирана локација.
Акцијата била спроведена на 12 и 13 ноември 2026 година, на повеќе локации во Унгарија. При претресите истражителите откриле околу шест милијарди форинти во готовина, складирани на различни места, вклучително и во земјоделски и магацински објекти.
Снимката е објавена околу месец и половина по приведувањето на Миклош Шештак, а случајот предизвика реакции и во унгарската политичка јавност.
Од партијата Фидес соопштија дека се надеваат оти објавените снимки немаат никаква поврзаност со поранешниот министер, но истовремено порачаа дека Фидес-КДНП не може да биде поврзана со лица кои не ја почитуваат дадената заклетва.
Унгарскиот премиер Петер Маѓар во неколку наврати ја коментираше акцијата, обвинувајќи ја претходната власт за злоупотреби и корупција.
„Додека секојдневно се појавуваат сè повеќе докази за тоа како мафијата на Орбан ја ограбувала нашата земја, владата на ТИСА за само шест месеци веќе исполни многу од своите важни ветувања. Продолжуваме понатаму, чекор по чекор“, порача Маѓар.
