Јапонските регулаторни тела извршија претрес во просториите на четирите најголеми производители на пиво во земјата – Асахи, Сапоро, Кирин и Сантори Спиритс – поради сомневање дека меѓусебно соработувале и договарале зголемување на цените на своите производи.
Сите четири компании ја потврдија информацијата, наведувајќи дека Јапонската комисија за фер трговија (ЈФТЦ) извршила претрес во нивните објекти и дека целосно ќе соработуваат со регулаторот.
Четирите компании практично доминираат на јапонскиот пазар на пиво, а нивните производи се меѓу најзастапените во супермаркетите и продавниците ширум земјата.
Веста за истрагата веднаш предизвика реакција на берзата. Акциите на Асахи, Кирин и Сапоро забележаа пад, додека пиварскиот сегмент на Сантори не е јавно котиран на берзата.
„Не негирам дека денеска се спроведува истрага, но би се воздржал од коментар за деталите бидејќи во тек е прелиминарна проверка“, изјави генералниот секретар на ЈФТЦ, Хиро Иванари, за локалните медиуми.
Според „Џапан Тајмс“, истрагата е насочена кон серијата поскапувања што стапиле во сила во април минатата година и во октомври 2022 година. Сите четири компании претходно ги оправдувале поскапувањата со зголемените трошоци за суровини, енергија и транспорт.
Потегот на ЈФТЦ е продолжение на засилениот надзор над јапонскиот пазар на храна и пијалаци. Во јуни регулаторот започна истрага и за наводна картелска активност меѓу водечките производители на сладолед во Јапонија, меѓу кои и гигантите Меиџи и Езаки Глико.
