Турскиот претседател Реџеп Таип Ердоган порача дека турските пазари на капитал ќе излезат од актуелната криза со инвестициските фондови „исчистени од алчни паразити“ и вети дека владата ќе ги преземе сите неопходни мерки за надминување на кризата.
Тој истакна дека правната и политичката одговорност за случајот е на властите и порача дека никој што ги загрозил правата на граѓаните нема да остане неказнет.
„Ги започнуваме неопходните административни и правни постапки за заштедите на нашите граѓани да бидат исплатени во најкус можен рок, без притоа да се оптовари државниот буџет“, изјави Ердоган.
Колапсот на фондовите вредни повеќе од 20 милијарди долари
Кризата ескалираше минатиот месец, кога финансиските регулатори наредија ликвидација на повеќе од 130 инвестициски фондови со кои управувале седум друштва за управување со имот, откако било утврдено дека тие повеќе не можат да ги исплаќаат инвеститорите.
Фондовите опфатени со ликвидацијата во изминатите три години достигнале вредност од повеќе од 20 милијарди долари, а според податоците на надлежните институции, погодени се речиси половина милион инвеститори.
Истрагата за манипулации на пазарот на акции и инвестициски фондови во меѓувреме е проширена. Турскиот министер за правда Акин Ѓурлек потврди дека досега се уапсени 85 осомничени лица.
Започнати истраги за пропустите и одговорноста
За надзор над ликвидацијата на фондовите е задолжен новоформираниот Одбор за координација на фондовите, предводен од турскиот потпретседател Џевдет Јилмаз.
Државниот надзорен совет доби задача да ги испита сите околности што довеле до кризата.
„Нема да замижиме ниту пред најмалиот пропуст, ниту пред кршењето на законите и правилата“, изјави Ердоган.
Тој додаде дека има поединци кои посакуваат економски колапс на Турција, но дека финансискиот систем ќе излезе од кризата постабилен и поздрав.
„Пазарите на капитал ќе се ослободат од алчните паразити кои се хранат од заштедите на малите инвеститори“, порача Ердоган.
Зборувајќи за политичката и моралната одговорност, Ердоган оцени дека случајот не може да се одвои од етиката и довербата врз кои е основана неговата партија.
Скандал во врвот на владејачката партија
Случајот доби и директна политичка димензија откако Фатма Бетул Сајан Каја минатиот месец поднесе оставка од функцијата потпретседателка на владејачката Партија на правдата и развојот (АКП).
Оставката следуваше по обвинувањата дека таа и нејзиниот сопруг оствариле огромен профит со тргување со акции непосредно пред избивањето на кризата.
Турското Министерство за правда потврди дека двајцата денеска треба да дадат исказ во својство на осомничени пред Одделот за истраги на финансиски криминал и перење пари при Главното обвинителство во Истанбул.
Се очекува и Одборот за пазарот на капитал против нив да поднесе кривични пријави согласно Законот за пазарот на капитал.
