Велика Британија се надева дека ќе постигне договор со Европската унија со кој би се избегнало британските компании да бидат погодени од новите трговски правила на ЕУ „Произведено во Европа“.
Ова го изјави британскиот министер задолжен за европските односи, Хемиш Фалконер, кој порача дека е во огромен интерес и на Лондон и на Брисел да постигнат договор за предложените трговски мерки.
„За Европа да биде поконкурентна и поспособна да ги издржи шоковите за кои сите зборуваме, мора да работиме заедно. Аргументот е толку убедлив и силен што уверен сум дека ќе дојдеме до разумно решение за сите“, изјави Фалконер за подкастот „Бриселс Плејбук“ на „Политико“.
Брисел во моментов ги ажурира трговските правила со цел да им даде предност на производителите од ЕУ во однос на компаниите надвор од Унијата. Лондон стравува дека дел од британските компании би можеле да ги почувствуваат последиците од новите правила.
Велика Британија побара од ЕУ гаранции дека британските производители нема да бидат погодени, но Брисел засега не може да ги даде таквите гаранции, бидејќи правилата сè уште минуваат низ сложен законодавен процес.
Доколку не биде постигнат договор, Лондон смета дека Спогодбата за трговија и соработка (TCA), која ги регулира трговските односи по Брегзитот, би можела да го натера Брисел повторно да ги разгледа своите планови.
„Нашите трговски односи се засноваат на Спогодбата за трговија и соработка. Тоа е силен договор меѓу нас, кој се надгледува независно и обезбедува значителна заштита за двете страни. Нашата основна порака до пријателите е дека европската конкурентност нема да се подобри со поставување дополнителни пречки пред нашата индустриска база“, порача Фалконер.
Дел од претставниците во Брисел се согласуваат со британската позиција. Правни експерти во Советот на ЕУ предупредиле дека плановите на Унијата за Законот за индустриски акцелератор (IAA) би можеле да бидат во спротивност со меѓународните трговски договори што ги има потпишано ЕУ.
Фалконер навести дека Лондон сака едноставен договор со кој британската стока би се третирала како стока со потекло од ЕУ во рамките на IAA.
Сепак, британскиот министер не сакаше да открие дали успехот на претстојниот самит ЕУ–Велика Британија ќе зависи од постигнувањето договор за правилото „Произведено во Европа“.
На самитот се очекува да биде официјализиран напредокот во разговорите за земјоделско-прехранбените производи, визите за млади и трговијата со емисии на гасови, но и да се отвори патот за понатамошни преговори.
„Не сакам да избрзувам кога станува збор за разговорите. Порано бев дипломат и знам дека ниту една дискусија или преговори не стануваат полесни ако јавно се разгледуваат нивните детали“, изјави Фалконер.
Тој ги отфрли и тврдењата дека ЕУ бара од Велика Британија да ги зголеми царините за кинеските автомобили во замена за гаранции поврзани со IAA.
Фалконер, кој престојуваше во Стразбур на својата прва пленарна седница на Европскиот парламент, потврди дека со европските партнери ќе разговара и за идните односи, откако британскиот премиер Енди Бернам сугерираше дека Велика Британија би можела повторно да ѝ се приклучи на ЕУ, или барем на нејзината царинска унија или единствениот пазар.
„Ќе го договориме тоа со нашите пријатели, а вие први ќе дознаете“, рече Фалконер.
