Франција ќе ослободи 10 милиони барели дизел од своите стратешки резерви во наредните три месеци, најави францускиот премиер Себастијан Лекорни. Се очекува овој потег да придонесе за намалување на цената на дизелот за 10 до 18 центи.
Лекорни изјави дека францускиот претседател Емануел Макрон одржува серија дипломатски состаноци со цел да се координира распоредувањето на стратешките резерви на нафта, пренесува „Фигаро“.
„Кога живеете далеку од работното место, полнењето на резервоарот значително го оптоварува месечниот буџет“, рече Лекорни.
Тој додаде дека владата ги зголемила субвенциите за возачите кои поминуваат голема километража, додека ваучерот за енергија за најсиромашните домаќинства ќе биде исплатен во јануари, наместо напролет.
Лекорни изјави дека ги разбира барањата за намалување на даноците, но потсети дека за време на пандемијата на коронавирусот биле потрошени повеќе од 70 милијарди евра за помош на населението, додека националниот долг продолжува да расте.
Зборувајќи за економскиот раст, францускиот премиер изјави дека целта на владата е јавниот дефицит да се намали на пет проценти од БДП. Сепак, според актуелните проекции, дефицитот би изнесувал 5,5 проценти.
Лекорни истакна дека стареењето на населението дополнително го зголемува притисокот врз пензискиот систем и јавните финансии.
