Германците кои пушат цигари или пури од јануари би можеле да плаќаат значително повеќе од досега.
Доколку владејачката коалиција во германскиот Бундестаг го спроведе својот даночен план, давачките значително ќе се зголемат.
„Тоа би била даночна експлозија, поради која цените би пораснале за 50 до 60 отсто“, изјави Бодо Мерлајн, директор на Сојузното здружение на индустријата за пури.
Таквиот удар би можел сериозно да ја погоди индустријата за пури, која и сега се соочува со намалена побарувачка.
„Ако една просечна пура сега чини 10 евра, потоа би можела да чини околу 16 евра. Тоа е толку голема разлика што многу потрошувачи веројатно би се воздржале од купување“, објасни Мерлајн.
„Лошата економска ситуација се чувствува и кај нас. Прометот на германската индустрија за пури годинава би требало да биде за шест до седум отсто помал во споредба со минатата година“, наведе Мерлајн.
Поради високите цени на горивата и другите поскапувања во секојдневниот живот, потрошувачите повнимателно го трошат секое евро.
Според податоците на здружението, во Германија пури произведуваат седум компании. Четири се наоѓаат во Бинде, а една во областа Минден-Либеке, сите во северозападниот дел на земјата. Покрај нив, работат и 15 увозници.
Во целата индустрија се вработени околу 1.640 работници. Тутунот за пурите и цигарилосите што се произведуваат во Германија главно пристигнува од Латинска Америка и Индонезија.
Годишно во Германија, според податоците на здружението, се продаваат околу две милијарди цигарилоси и пури. Двата производи спаѓаат во иста даночна категорија, па државата не прави разлика меѓу нив.
„Доколку коалицијата значително не го ублажи својот план, тоа тешко ќе нè погоди. Загубата на работни места веројатно би била неизбежна“, рече Мерлајн.
Тој нагласи дека производите на оваа индустрија не се само луксузна стока.
„Не претставуваме само врвни пури поскапи од 100 евра, туку и квалитетни производи од средната класа. Нашите купувачи не се само богати луѓе, туку и обични луѓе кои сакаат да запалат цигарилос во својата градина“, додаде тој.
Претставникот на здружението е загрижен и за околу 500 специјализирани продавници во Германија кои продаваат пури и цигарилоси.
