Цените на горивата во Германија достигнаа историски максимум, додека цената на дизелот е веднаш под својот рекордно високо ниво. Германската владејачка коалиција најавува брза реакција.
Мерките за справување со рекордно високите цени на горивата во Германија ќе стапат во сила на 1 октомври, изјави шефот на пратеничката група на владејачките демохристијани (ЦДУ/ЦСУ) во Бундестагот, Торстен Фрај.
„На луѓето не им е потребно ветување дека ќе им биде полесно, туку конкретно олеснување“, изјави Фрај за телевизијата РТЛ.
Канцеларот Фридрих Мерц ден претходно најави дека владата ќе „реагира на неоправданото зголемување на цените“, но не прецизираше за какви мерки станува збор.
Цените на горивата во Германија нагло пораснаа од почетокот на војната со Иран.
Бензинот во средата достигна нов рекорд, со просечна цена од 2,30 евра за литар, покажуваат податоците на германскиот автомобилски клуб АДАК.
Дополнително поскапе и дизелот, кој достигна 2,422 евра за литар и се приближи до претходниот рекорд од 2,447 евра, забележан во април.
Владата на Мерц на почетокот на годината воведе двомесечно намалување на данокот на горивата со цел да им ја олесни ситуацијата на возачите.
Сепак, сè повеќе се зголемуваат повиците до Берлин повторно да интервенира, бидејќи цените на горивата остануваат високи, а на конфликтот на Блискиот Исток не му се гледа крајот.
За разлика од коалициските партнери, социјалдемократите, Мерц ја отфрла можноста за воведување данок на екстрапрофит на нафтените компании.
Фрај исто така го отфрли тој предлог и се заложи за повторно воведување даночен попуст на горивата или намалување на ДДВ-то на горивата од 19 на 7 отсто.
Тој истакна дека државата остварува поголеми приходи од високите цени на горивата преку ДДВ.
„Затоа, враќањето на дел од тие пари на граѓаните би било логичен чекор“, рече Фрај.
