Претседателот на САД, Доналд Трамп, го нарече „смешен“ предлогот на Европската унија Канада да стане нејзина прва придружна членка и се закани со воведување „многу сериозни царини“ или намалување на трговијата со ЕУ.
Трамп потегот на Брисел го нарече можен „непријателски чин“, наведувајќи дека САД ќе воведат високи царини за Европа доколку проценат дека намерата на предлогот е лоша.
Претседателката на Европската комисија, Урсула фон дер Лајен, вчера го повика канадскиот премиер Марк Карни Канада да стане прва „придружна членка“ на ЕУ, со предлог за продлабочување на соработката во областите на технологијата, одбраната и енергетиката.
Фон дер Лајен изјави дека ЕУ и Канада треба да ги продлабочат односите во време кога демократските земји се соочуваат со „пукнатина во меѓународниот систем заснован на правила“.
Како области за соработка ги наведе и критичните минерали, батериите, вештачката интелигенција, сајбер-безбедноста и економската безбедност.
Канада и ЕУ веќе имаат трговски договор и низа билатерални договори, а нивните односи дополнително се продлабочија по враќањето на Трамп во Белата куќа и зголемувањето на американските царини.
Трамп претходно зборуваше и за можноста Канада да стане 51. сојузна држава на САД, а истовремено ја критикуваше Европската унија.
Канада во средата официјално поднесе барање за приклучување кон Заедничките експедициски сили, воено партнерство за брзо реагирање предводено од Велика Британија, во кое учествуваат 10 членки на НАТО, меѓу кои Данска, Холандија, Норвешка и Шведска.
Карни и британскиот премиер Енди Бернам вчера разговарале за продлабочување на соработката во областа на одбраната, како и за можностите и предизвиците поврзани со вештачката интелигенција.
Даунинг стрит соопшти дека тие ја нагласиле важноста на блиските врски со европските партнери, особено во трговијата и одбраната.
ЕУ досега немала категорија „придружно членство“, а деталите за евентуалниот статус, вклучително и односот на Канада со единствениот европски пазар, допрва треба да бидат дефинирани.
Фон дер Лајен изјави дека ЕУ сака односите со Канада да ги подигне „на највисоко можно ниво“ и од соработка заснована првенствено на трговијата да премине кон поширок „сојуз за иднината“.
