Германскиот малопродажен синџир Mac Geiz, специјализиран за производи за домаќинство, ќе затвори околу 50 продавници како дел од постапката за реструктуирање по отворањето на стечајната постапка.
Од компанијата соопштија дека, според сегашните проценки, ќе мора да ја намалат продажната мрежа, но засега не е познато кои продавници ќе бидат затворени. Конечниот план се очекува да биде познат најдоцна до есента 2026 година.
Mac Geiz уште во мај поднесе барање за отворање стечајна постапка до судот во Хале, а од 1 август официјално започна постапката за самостојно управување. Судот за стечаен управник го назначи експертот за реструктуирање Лукас Флетер, кој ќе го надгледува процесот во интерес на доверителите.
Како дел од мерките за намалување на трошоците, компанијата веќе отпушти 66 вработени од секторите продажба, логистика и сервисни центри, како и уште петмина вработени во поврзаната компанија MTH Retail Services.
Од Mac Geiz наведуваат дека работат во исклучително тешки економски услови и дека реструктуирањето носи сериозни предизвици за компанијата.
Според последните податоци, Mac Geiz има околу 183 продавници низ Германија и вработува 1.175 лица. По истекот на периодот на државна поддршка во рамките на стечајната постапка, компанијата повторно самостојно ќе ги исплаќа платите на своите вработени.
