Сѐ поголем број домаќинства во Германија се соочуваат со исклучување на струјата и гасот поради неплатени сметки, покажуваат најновите податоци на Федералната агенција за мрежи и организациите за заштита на потрошувачите.
Во текот на 2024 година без електрична енергија останале повеќе од 245.000 домаќинства, што е значително повеќе во споредба со околу 204.000 исклучувања регистрирани во 2023 година.
Трендот продолжува и во 2025 година. Од јануари до септември се евидентирани околу 196.000 исклучувања на струја и уште 27.000 прекини во испораката на природен гас.
Паралелно со растот на бројот на исклучувања, повеќе од двојно е зголемен и бројот на поплаки од граѓаните. Истражување спроведено меѓу 58 оператори на дистрибутивни мрежи покажало големи разлики во цените за повторно приклучување.
Трошоците за повторно приклучување на електрична енергија се движат од 92 до 231 евро, додека за гас изнесуваат од 92 до 315 евра. Дополнително, некои компании наплаќаат и излегување на техничар доколку корисникот не е дома во договорениот термин, а тие трошоци се движат меѓу 24 и 99 евра.
Според германските прописи, дистрибутерот не смее веднаш да ја исклучи струјата или гасот. Исклучување е дозволено само ако долгот изнесува најмалку двојно повеќе од месечната аконтација и надминува 100 евра. Корисникот мора однапред да добие писмено предупредување најмалку четири недели пред планираното исклучување, како и дополнително известување најдоцна осум работни дена пред спроведувањето на мерката.
Исклучување не е дозволено доколку постои очигледна грешка во пресметката или ако таквата мерка би била несразмерна со конкретните околности.
