Франција од 11 август воведува нови правила за телефонскиот маркетинг, со кои компаниите повеќе нема да смеат да ги контактираат граѓаните без нивна претходна изречна согласност.
Со новите прописи се укинува досегашниот систем, според кој телефонските повици беа дозволени освен ако граѓаните не се запишале во регистарот за заштита од несакани повици „Блоктел“. Наместо тоа, компаниите ќе мора однапред да обезбедат јасна и недвосмислена согласност од потрошувачот пред да упатат каков било промотивен повик.
Согласноста нема да смее да биде скриена во општите услови за користење, а компаниите ќе мора да докажат дека ја добиле. Таа ќе важи најмногу една година, нема автоматски да се обновува, а граѓаните ќе можат да ја повлечат во секое време, дури и за време на телефонски разговор.
Компаниите ќе бидат обврзани најмалку три години да чуваат докази за тоа кога и на кој начин е дадена согласноста.
Исклучок ќе има за компании кои веќе имаат активен договор со корисникот и нудат производи или услуги поврзани со тој договор, како и за претплати на весници и списанија.
Забранети остануваат повиците поврзани со енергетска санација на објекти, адаптација на домови за лица со намалена самостојност и понуди за стручни обуки, освен ако самиот потрошувач претходно не ги побарал.
Комерцијалните телефонски повици и натаму ќе бидат дозволени само во работни денови од 10 до 13 часот и од 14 до 20 часот. Ист потрошувач нема да смее да биде контактиран повеќе од четири пати во рок од 30 дена.
За прекршување на новите правила се предвидени казни до 75.000 евра за физички лица и до 375.000 евра за компании, додека во потешки случаи санкциите можат да достигнат и до пет години затвор и парични казни до 500.000 евра или 10 проценти од годишниот промет на компанијата.
