Пиварската компанија Heineken соопшти дека акционерите го одобриле назначувањето на Рафаел Оливеира за нов претседател на Извршниот одбор и главен извршен директор (CEO).
Оливеира ќе ја преземе функцијата на 1 октомври 2026 година, а неговиот мандат ќе трае четири години.
Со ова именување Heineken отвора ново поглавје во својата историја, бидејќи Оливеира е првиот главен извршен директор кој не ја изградил својата кариера во рамките на компанијата. Досега највисоките раководни позиции традиционално се пополнуваа со внатрешни унапредувања.
Тој доаѓа од компанијата JDE Peet’s, каде што од ноември 2024 година ја извршуваше функцијата главен извршен директор. Претходно десет години работел во инвестициската банка Goldman Sachs, а потоа уште една деценија во Kraft Heinz, каде што извршувал повеќе раководни функции во меѓународното работење.
Последната функција во Kraft Heinz му била извршен потпретседател за меѓународните пазари, одговорен за бизнис вреден повеќе од седум милијарди долари во Европа, Африка, Азија и Латинска Америка. Интересно е што досега нема работено во пиварската индустрија.
Промената на врвот на компанијата доаѓа по предизвикувачки период за Heineken. Во 2025 година компанијата пријави пад на приходите од 4,7 проценти, на 34,3 милијарди евра, а истовремено го претстави и планот за реструктуирање „EverGreen 2030“, кој предвидува укинување меѓу 5.000 и 6.000 работни места ширум светот.
По објавувањето на назначувањето на Оливеира, акциите на Heineken пораснаа за 2,4 проценти.
