Шпанскиот остров Мајорка повторно се подготвува за нов бран протести против масовниот туризам. За 26 јули е најавен голем протест во Палма, организиран од граѓански движења кои бараат ограничување на бројот на туристи и промена на туристичкиот модел на островот.
Организаторите тврдат дека масовниот туризам доведува до недостиг на станови, раст на цените на недвижностите, сообраќаен метеж и сè поголем притисок врз јавната инфраструктура. Според нив, локалното население сè потешко доаѓа до пристапно домување, додека бројот на туристи секоја година поставува нови рекорди.
За време на протестот се очекуваат привремени застои во сообраќајот и нарушувања во дел од туристичките зони. Локалните власти повикаа на мирни демонстрации, нагласувајќи дека туризмот останува клучен сектор за економијата на островот, но дека е потребно да се најде рамнотежа меѓу економскиот развој и квалитетот на живот на жителите.
