Србија наскоро ќе стане првата земја во Европа што ќе произведува хуманоидни роботи, најави српскиот министер за финансии Синиша Мали. Според неговите информации, производството треба да започне во текот на јуни, а планираниот капацитет во првата фаза ќе изнесува меѓу 1.000 и 2.000 роботи годишно.
Мали истакна дека роботите ќе бидат дел од подготовките за специјализираната изложба Експо 2027, која ќе се одржи во Белград. Според него, проектот ќе се реализира во неколку фази, при што покрај производството е предвидено и отворање на тренинг-центар за обука и усовршување на роботите.
„Роботите ќе учат да извршуваат различни задачи – од работа во хотели и угостителство, до примена во индустријата. Вештачката интелигенција ќе има клучна улога во нивниот развој и функционирање“, изјави Мали.
Според најавите, фабриката за производство на роботи ќе биде лоцирана во Шабац, како дел од поширок пакет кинески инвестиции во Србија. Властите очекуваат проектот да придонесе за отворање нови работни места и дополнителен технолошки развој на земјата.
Претходно и српскиот претседател Александар Вучиќ најави дека Србија ќе стане регионален центар за производство на хуманоидни роботи, со амбиција овие технологии во иднина да се извезуваат на европскиот пазар.
