Германските трговски синџири Edeka и Marktkauf повлекуваат замрзнати малини од брендот Gut & Günstig поради сомневање дека одредени пакувања може да содржат парчиња стакло.
Производителот Jütro Tiefkühlkost GmbH & Co. KG предупреди дека постои ризик од присуство на стаклени фрагменти во производот и ги повика потрошувачите да не го консумираат.
Повлекувањето се однесува на замрзнати малини во пакување од 500 грама. Компанијата официјално го извести трговскиот синџир Edeka, кој објави предупредување до купувачите.
Малините биле достапни во речиси цела Германија, со исклучок на покраините Шлезвиг-Холштајн и Мекленбург-Западна Померанија, како и градот Хамбург.
Купувачите кои го имаат спорното пакување не треба да го консумираат производот. Можат да го вратат во продавницата каде што го купиле, а парите ќе им бидат рефундирани и без приложување фискална сметка.
За дополнителни информации, производителот ја објави адресата kundenservice@juetro-tkk.de за контакт со потрошувачите.
