„Фолксваген“ за првпат по 15 години испадна од Euro Stoxx 50, најважниот берзански индекс кој ги следи 50-те најголеми компании од еврозоната.
Одлуката е последица на падот на пазарната вредност на германскиот производител на автомобили, чии акции изгубија повеќе од 75 отсто од вредноста во однос на врвот од 2021 година и сега се близу до најниското ниво во последните 16 години.
Промената на составот на индексот стапи на сила пред почетокот на тргувањето, а „Фолксваген“ беше заменет со компаниите Nokia и Engie. Од индексот излезе и холандската компанија Wolters Kluwer.
Stoxx, компанијата која управува со индексот, одлуките ги носи врз основа на однапред утврдени критериуми, пред сè пазарната вредност на акциите достапни за тргување. Отстранувањето на „Фолксваген“ затоа не е политичка одлука, туку последица на повеќегодишниот пад на вредноста на компанијата, пишува Business Insider, а пренесува порталот Biznis.
Падот на акциите го одразува недовербата на инвеститорите во планот за реструктуирање на „Фолксваген“, кој предвидува намалување на бројот на вработени за 100.000. Компанијата дополнително е под притисок од сè посилната конкуренција од кинеските производители и пошироките проблеми на европската автомобилска индустрија, која сè потешко успева да се натпреварува со цените, дури и на сопствениот пазар.
Аналитичарите на HSBC предупредуваат дека ризиците во целиот сектор се зголемени, додека ниската вредност на „Фолксваген“ укажува и на стравување дека трошоците за преуредување на работењето би можеле да бидат поголеми од придобивките што би ги донело.
Испаѓањето од индексот може дополнително да ја влоши позицијата на „Фолксваген“ на берзата. Околу 30 берзански фондови кои го следат Euro Stoxx 50 управуваат со имот вреден приближно 59 милијарди евра, а со истиот индекс се поврзани и повеќе од 110.000 структурирани финансиски производи со вкупна вредност поголема од 68 милијарди евра.
Фондовите кои механички го следат составот на индексот сега мора да ги продадат акциите на „Фолксваген“ и да купат акции од компаниите кои го заменија, без оглед на сопствената проценка за иднината на германскиот производител.
Одлуката се вклопува во поширокиот тренд на слабеење на големите европски автомобилски компании. Stellantis беше исфрлен од Euro Stoxx 50 уште минатата година, па два големи европски производители на автомобили во две последователни ревизии го загубија местото во водечкиот берзански индекс.
Stellantis на притисокот од кинеската конкуренција одговори и со планови да им овозможи на кинеските производители производство на автомобили во неговите недоволно искористени европски фабрики, наместо директно да се натпреварува со нив.
Истовремено, враќањето на Nokia во индексот покажува дека вниманието на инвеститорите сè повеќе се насочува кон компании кои имаат корист од развојот на инфраструктурата за вештачка интелигенција.
Nokia се врати во индексот благодарение на силниот раст на приходите во тој сегмент, додека традиционалните индустриски компании како „Фолксваген“ ја губат пазарната вредност. Слични промени веќе се видливи и на американските берзи, каде компаниите поврзани со развојот на вештачката интелигенција сè повеќе ги потиснуваат претходно доминантните имиња.
Исфрлањето од индексот не е причина за кризата на „Фолксваген“, туку последица на проблемите кои инвеститорите веќе ги вградиле во цената на акциите. Сепак, задолжителната продажба на акциите на „Фолксваген“ што ќе ја спроведат фондовите поврзани со Euro Stoxx 50 би можела дополнително да ја оптовари цената на акциите во наредниот период.
