Сè поголем број француски возачи се обидуваат дизел горивото да го заменат со масло од репка поради големата разлика во цената. Сепак, експертите предупредуваат дека ваквата практика може да оштети одредени мотори, а во Франција претставува и царински прекршок.
На социјалните мрежи последните денови вирално се шири снимка од возач кој во резервоарот на автомобилот сипа прехранбено масло. Цената на маслото изнесува околу 1,45 евра за литар, додека цената на дизелот на некои француски бензински станици достигнува речиси три евра, пренесува францускиот портал La Voix du Nord.
Една Французинка изјавила дека веќе 15 години користи отпадно масло за јадење како гориво за својот „мерцедес“. Таа наведува дека маслото претходно го остава да се таложи и го филтрира, а го набавува од угостители и сопственици на мобилни угостителски објекти.
Експертите, сепак, предупредуваат дека маслото од репка нема исти физички својства како дизелот и може да доведе до создавање наслаги во инјекторите и пумпата за вбризгување.
Професорката на Универзитетот во Орлеан и експертка за процеси на согорување, Кристин Русел, наведува дека постарите автомобили, особено моделите од 1980-тите и 1990-тите години, се поотпорни на промени во карактеристиките на горивото поради различните системи за вбризгување.
Кај современите дизел автомобили, електронскиот систем за управување со моторот прецизно ја регулира количината на гориво што се вбризгува во моторот. Промената на карактеристиките на горивото може да доведе до неправилно дозирање, намалување на моќноста и проблеми со забрзувањето, предупредува таа.
Француската царинска служба исто така предупредува дека користењето растителни масла како гориво претставува царински прекршок. Покрај парична казна, возилото може да биде и запленето.
Според регионалната царинска управа во Дижон, можноста за користење растителни масла како гориво со закон е предвидена само за одредени професионални корисници во земјоделството, градежништвото и транспортот кои имаат сопствени флоти на возила.
Просечната цена на дизелот во Франција достигна 2,41 евро за литар, што претставува историски рекорд. На некои бензински станици цената достигнува дури 2,90 евра за литар, приближувајќи се до границата од три евра. На околу 700 бензински станици низ земјата цената надмина 2,50 евра за литар.
