OpenAI и Microsoft постигнаа договор со кој вкупните плаќања од делење приходи меѓу двете компании ќе бидат ограничени на 38 милијарди долари, објавија светските медиуми повикувајќи се на информации од The Information.
Новиот договор доаѓа по неодамнешното редефинирање на партнерството меѓу двете компании, кое му овозможува на OpenAI поголема слобода за соработка со други технолошки и cloud партнери, како Amazon и Google.
Според договорот, Microsoft ќе продолжи да добива дел од приходите на OpenAI до 2030 година, но со однапред поставен лимит. Истовремено, Microsoft повеќе нема да плаќа дел од своите приходи на OpenAI.
Медиумите наведуваат дека овој потег може да му помогне на OpenAI да прикаже постабилна финансиска слика пред потенцијално излегување на берза, за кое се шпекулира дека би можело да се случи уште оваа година.
Microsoft од 2019 година инвестираше околу 13 милијарди долари во OpenAI, а партнерството меѓу двете компании беше клучно за развојот на ChatGPT и интеграцијата на вештачката интелигенција во Azure и другите производи на Microsoft.
