Јапонската компанија PowerX влегува на црногорскиот пазар преку стратешко партнерство со Електростопанство на Црна Гора (EPCG), со план за развој на батериски системи за складирање електрична енергија со капацитет од 500 MWh.
Како што објавија компаниите, потпишан е Меморандум за разбирање кој предвидува развој на BESS системи (Battery Energy Storage Systems) во текот на следните три години. Целта на проектот е подобрување на стабилноста на електроенергетската мрежа и поддршка на поголема интеграција на обновливи извори на енергија.
Од PowerX посочуваат дека Црна Гора има стратешка позиција поради поврзаноста со европскиот енергетски пазар и кабелската врска со Италија, што ја прави важна точка за развој на чиста енергија во регионот.
Според договорот, двете компании ќе работат на модели за имплементација на батериските системи, со фокус на намалување на оптоварувањата на мрежата, регулирање на фреквенцијата и подобрување на енергетската сигурност. Дополнително, PowerX ќе разгледа можност за отворање локални капацитети за склопување батериски системи во Црна Гора.
Црна Гора претходно усвои Национален енергетски и климатски план со кој се предвидува најмалку 50 проценти од финалната потрошувачка на енергија до 2030 година да биде од обновливи извори.
