Бугарија официјално го воведе еврото на 1 јануари, со што нејзината национална валута – бугарскиот лев – влезе во историјата по повеќе од еден век употреба.
Бугарскиот лев ќе се менува по фиксен девизен курс: 1 евро = 1,96 лева.
Бугарија го усвои еврото како своја валута на 1 јануари 2026 година, што претставува важна пресвртница за земјата, за историјата на еврото и за ЕУ како целина, а ова доаѓа по период на интензивни подготовки и напори од страна на Бугарија да ги исполни сите потребни барања, објави Европската комисија (ЕК).
Како што е наведено, еврото ќе донесе практични придобивки за бугарските граѓани и бизниси – ќе го олесни патувањето и животот во странство, ќе ја зголеми транспарентноста и конкурентноста на пазарот и ќе ја олесни трговијата.
ЕК, се додава, целосно ја поддржа Бугарија во процесот на приклучување кон еврото, а со пристапувањето на Бугарија, 21 земја-членка на ЕУ и повеќе од 357 милиони граѓани на ЕУ ќе делат заедничка валута.
Претседателката на ЕК, Урсула фон дер Лајен, изјави дека приклучувањето на Бугарија кон Еврозоната, едно од најголемите достигнувања на Европската Унија, одразува години напорна работа и посветеност, надминување на предизвиците.
„Еврото ќе им користи на бугарскиот народ, олеснувајќи ги плаќањата и патувањата. Ќе донесе нови можности за бугарските бизниси, овозможувајќи им подобро да ги искористат предностите на нашиот заеднички единствен пазар. Дополнително ќе го зајакне гласот на Бугарија во Европа. Овој чекор е добар за Бугарија и ја зајакнува Европа како целина. Ја прави нашата економија поотпорна и поконкурентна на глобално ниво. Честитки, Бугарија! Можеш да бидеш горда на она што си го постигнала“, рече фон дер Лајен.
