Индија официјално ја престигна Јапонија и стана четврта најголема економија во светот со бруто домашен производ од 4,18 трилиони долари, а се очекува да ја престигне и Германија и да го заземе третото место до 2030 година.
Владата во Њу Делхи во својата годишна изјава предвидува дека во 2030 година бруто домашниот производ на Индија ќе изнесува 7,3 трилиони долари, објавува „Тајмс оф Индија“.
Во вториот фискален квартал, од јули до септември, економијата на Индија порасна за дури 8,2 проценти на годишно ниво, што претставува највисок раст меѓу големите економии.
Силната домашна потрошувачка и растот на приватните инвестиции се клучните двигатели на растот, а аналитичарите истакнуваат дека стабилната фискална политика и растот на кредитните текови им овозможија на компаниите да го прошират производството и да го стимулираат вработувањето, што дополнително го зајакнува економскиот моментум.
Во изминатата година, индиската влада спроведе голем број реформи што го олеснуваат работењето, вклучително и подобрувања во даночниот систем и стимулации за странските инвеститори.
Овие мерки создадоа средина поволна за долгорочни инвестиции и технолошки развој, што е особено важно за индустриите со висока додадена вредност.
Меѓународните финансиски институции го потврдуваат оптимизмот, бидејќи Светската банка очекува економски раст на Индија од 6,5 проценти во 2026 година, агенцијата Мудис предвидува раст од 6,4 до 6,5 проценти, додека ММФ и ОЕЦД предвидуваат стабилен раст во наредните години.
