Компанијата Пенсана потврди дека се откажува од изградбата на фабрика за преработка на ретки земни метали во Велика Британија и го преместува производството во Соединетите Американски Држави, што значи дека Велика Британија губи стратешка можност за развој на оваа гранка од економијата, објавува Скај њуз.
Претседателот на Пенсана, Пол Атерли, вели дека одлуката е донесена откако американската администрација обезбедила гаранции за купување на ретки земни метали од калифорнискиот рудник Маунтин Пас. Ниту една европска влада не понудила слични услови.
Според него, преработката на ретки земни метали во Велика Британија во моментов е непрофитабилна поради високите трошоци за енергија и сложеноста на процесот.
Пенсана првично планираше да изгради фабрика од 288 милиони евра во Велика Британија за преработка на ретки земни метали, кои би се користеле за производство на магнети за електрични автомобили и ветерни турбини.
Одлуката претставува нов удар за британската хемиска индустрија, која се соочува со голем број проблеми и серија затворања.
Министерството за бизнис и трговија на Обединетото Кралство објави дека наскоро ќе биде претставена нова стратегија за критични минерали и дека продолжуваат напорите за намалување на трошоците за индустриска енергија.
